سويها بنفسك: ماسك قلام قلو ❀ DIY: GLAMGLOW Face Mask

السلام عليكم ورحمة الله وبركاته 

أغلبنا سمع عن ماسكات قلام قلو , ماسكات مشاهير هوليوود وكيف أنها مره جميلة
بس سعرها ٣٥٠ ريال مره مرتفع على ماسك ممكن يجف قبل ماتخلصينه كله !!!

صراحة مااكنت اتوقع ابببد بلقى طريقة  اقدر اسويها بنفسي وتعطي نتيجة مقاربه له ابببببد

جربت هذي الطريقة وانبسط على النتايج مره 

ومو بس الماسك أرررررررررررررخص بعد أقل جفاف على الوجه من قالم قلو الاصلي

الماسك هذا يشبه Supermud اكثر من Youthmud

المكونات :
8 ملعقة كبيرة شاي البابونج  (ممكن تستخدمين شاهي اخضر بداله)
1 ملعقة كبيرة زيت جوز الهند
1/4 كوب من الطين الهندي

6 كبسولات الفحم المنشط
3 قطرات من زيت شجرة الشاي الأساسي ( Tea Tree )

3 قطرات من زيت شجرة الكينا الأساسي ( Eucalyptus )

1 ملعقة كبيرة جل الألوة فيرا (طازج أو  99.9٪ )

تنبيه : لا تستخدمين الأواني المعدنية لما تستخدمين الطين الهندي ، استخدمي البلاستيك ، زجاج أو أدوات خشبية 

الطريقة :
* انقعي كيش شاهي البابونج في كاس مويه حار وخليه على جنب لين يبرد
في أثناء ذلك < متعوب عليها هههه
* ذوبي زيت جوز الهند إذا كان جامد عندك واجمعيه مع جميع المكونات ماعدا الشاهي واخطيهم

طبعاً كبسولات الفحم افتحيها من النصف وطلعي البودرة منها بس


( كبسولات الفحم بتحوسك شوي)

( الماسك بدون اضافة شاهي البابونج )

اضيفي الشاهي بعد مابرد شوي شوي وأنتي تحركين لين يطلع لك القوام المناسب (يكون ثقيل ودسم وبنفس الوقت سهل المد على الوجه)

بعدها احفطيه بعلبة زجاجية محكمة الإغلاق ويفضل يكون لونها غامق

 يترك بالثلاجة لمدة ساعة تقريبا قبل أول استخدام

( شكل الماسك النهائي )

طريقة الحفظ :
الافضل يحفظ بالثلاجة لان الجو عندنا حار ومافي اي مواد حافظة بالماسك
ايضاً احفظيه بمكان مظلم لان النور يقلل من فعالية الماسك


كيفية الإستخدام :
وزعي الماسك على بشرة نظيفه واتركيه من 10 لـ 20 دقيقه لحد ماينشف ، ممكن تحسين بوخزات هالشيء طبيعي
عند الإزالة ممكن مايروح كل الماسك بمويه بس ، استخدمي غسول للبشرة أو تونر ،
ممكن يكون بشرتك محمرة شوي عادي (من الطين الهندي وسبق وذكرت هذا في الريفيو حقه هنا)
طبعاً لا تنسين ترطيب البشرة .


النتيجة :
حسيت بشرتي نظظظيفة وناااعمة وفيها نضارة
المسام مرره أصغر و الرؤوس السوداء أقل ، كل هذا من أول استخدم
مرررره حبيته وانصحكم تسونه

المكونات أغلبها شريتها من اي هيرب